寶溫盃客語朗讀比賽邁入第 13 屆，而受到新冠肺炎疫情影響，這屆賽事從 4 月延至 7 月 25 日，今年特別以泛科學網站文章，作為朗讀素材，鼓勵更多人來傳播科學知識。以下收錄相關朗讀素材供參考。
原始文章連結：煮熟的湯圓為什麼會浮起來？
煮熟个粄圓做麼个會浮起來？（海陸腔）
愛煮一碗好食个粄圓，其實盡簡單，先煮一鑊水，水滾後摎粄圓放落鑊肚緊摝莫畀黏底臭火燒，等到粄圓浮起，用細火煮成兩分鐘，就做得起鑊加湯趕燒食咧。煮粄圓个過程中有一兜細「孔翹」做得分粄圓還較好食，若係粄圓會浮到水面再過煮幾分鐘就堵堵好，甜湯摎粄圓愛分鑊煮正好食，到底仰般會恁樣形喏？
一切都愛對粄圓个主要材料，糯米粉開始講起。糯米粉个主要化學成分係澱粉，摎澱粉在室溫下摻水毋會有昶劇烈个反應，斯係吸水略略仔膨脹，過後就沉澱。若係澱粉混合適量个水份同時加熱（60-70 度，依照澱粉種類），就會產生所謂个「糊化反應」，原先聚集共下个生澱粉間个鍵結分人搖動，水分子順空縫插入澱粉分子間，若係有罅个水摎熱能進行到最尾，水分子就會包圍澱粉分子──也就係澱粉溶解在水溶液裡肚咧。
在灶下肚進行一隻牽漿个動作，前半段就係標準个糊化反應：本成太白粉在室溫下摻水不過係隻可疑个白粉懸浮液，摎佢倒落燒碌碌个湯肚，攪散幾秒鐘後白色个澱粉粒仔就全毋見忒咧，溶落湯肚咧──恁樣，就係一套完整个「糊化反應」。
牽漿个後半段，溫度降低後，原先因為高溫嗄分開个澱粉分子，彼此間个化學鍵拉力又開始拉近彼此，也就係所謂个醹化過程；牽漿愛等到降溫之後正做得看著結果，你个湯品（包黍醹湯、酸辣湯等）這時正開始黏黏醹醹。這也係做麼个一般粄圓摎甜湯會分開煮，因為煮粄圓過程中，有一部分个澱粉會在水竇肚完成糊化反應，還降溫後這兜澱粉會使著甜湯略略仔膏膏，口感毋好。
粄圓煮熟會浮起來主要就係因為半套个糊化反應，做麼个講半套喏？客倌您看清楚，粄圓並無變透明啊！煮粄圓加熱會破壞澱粉分子个結晶，分水分子順機會落去──也就係糊化个前半段。糊化化學反應進行个同時，粄圓个物理性質也有改變：當水進入到澱粉分子間，形成新个結構，分粄圓个體積變大咧。根據傳奇个阿基米德原理，物體受著个浮力等同於排開液體个體積；因為恁樣所以隨等煮粄圓个過程（半套）糊化反應緊進行，粄圓體積緊變大，所受著个浮力也因為恁樣續等增加，等粄圓得著个浮力等於粄圓本身个重量，就做得看著浮到水面个粄圓啦。
煮熟个粄圓做麼个會浮起來？（四縣腔）
愛煮一碗好食个粄圓，其實盡簡單，先煮一鑊水，水滾後摎粄圓放落鑊肚緊攪莫畀黏底臭火燒，等到粄圓浮起，用細火煮成兩分鐘，就做得起鍋加湯趕燒食咧。煮粄圓个過程中有兜仔細「孔翹」做得分粄圓還較好食，若係粄圓會浮到水面再過煮幾分鐘就堵堵好，甜湯摎粄圓愛分鑊煮正好食，到底仰般會恁樣形喏？
一切都愛對粄圓个主要材料，糯米粉開始講起。糯米粉个主要化學成分係澱粉，摎澱粉在室溫下摻水毋會有忒劇烈个反應，斯係吸水略略仔膨脹，過後就沉澱。若係澱粉混合適量个水分同時加熱（60-70 度，依照澱粉種類），就會產生所謂个「糊化反應」，原先聚集在共下个生澱粉間个鍵結畀動搖，水分子順空縫插入澱粉分子間，若係有罅个水摎熱能進行到最尾，水分子就會包圍澱粉分子──也就係澱粉溶解在水溶液裡肚咧。
在灶下肚進行一隻牽漿个動作，前半段就係標準个糊化反應：本成太白粉在室溫下摻水毋過係隻可疑个白粉懸浮液，摎佢倒落燒碌碌个湯肚，攪散幾秒鐘後白色个澱粉粒仔就全毋見忒咧，溶落湯肚咧──恁樣，就係一套完整个「糊化反應」。
牽漿个後半段，溫度降低後，原先因為高溫嗄分開个澱粉分子，彼此間个化學鍵拉力又開始拉近彼此，也就係所謂个醹化過程；牽漿愛等到降溫之後正做得看著結果，你个湯品（包黍醹湯、酸辣湯等）這時正開始黏黏醹醹。這也係做麼个一般粄圓摎甜湯會分開煮，因為煮粄圓過程中，有一部分个澱粉會在水竇肚完成糊化反應，還降溫後這兜澱粉會分甜湯略略仔醹醹，口感毋好。
粄圓煮熟會浮主要就係因為半套个糊化反應，做麼个講半套喏？客倌您看清楚，粄圓並無變透明啊！煮粄圓加熱會破壞澱粉分子个結晶，分水分順機會落去──也就係糊化个前半段。糊化化學反應進行个同時，粄圓个物理性質也有改變：當水進入到澱粉分子間，形成新个結構，分粄圓个體積變大咧。根據傳奇个阿基米德原理，物體受著个浮力等同於排開液體个體積；因為恁樣故所隨等煮粄圓个過程（半套）糊化反應緊進行，粄圓體積緊變大，所受著个浮力也因為恁樣續等增加，等粄圓得著个浮力等於粄圓本身个重量，就做得看著浮到水面个粄圓啦！
看更多客語版朗讀素材，請見：【寶溫盃】客語朗讀比賽「暢樂搞科學」
