寶溫盃客語朗讀比賽邁入第 13 屆，而受到新冠肺炎疫情影響，這屆賽事從 4 月延至 7 月 25 日，今年特別以泛科學網站文章，作為朗讀素材，鼓勵更多人來傳播科學知識。以下收錄相關朗讀素材供參考。
原始文章連結：睡不好嗎？看看今天是農曆幾號
毋好睡係無？看啊今晡日係舊曆幾多號？（海陸腔）
若係你這幾日翻去翻轉睡毋忒，看啊今晡日係舊曆幾多號，無定著係因為接近 15 號滿月，所以睡毋忒（當然毋係因為月光亮心慌慌）。研究發現，在接近滿月之前，就算月光無照落間肚，人會花較長个時間正睡忒，睡到較淺，睡目時間也較短。
無定著有兜人早就發現這點咧，逐隻月總有幾下日特別難睡，也有盡多奇聞軼事提著睡眠、情緒受著月光朔望週期个影響。毋知當科學家深入研究，總係在統計結果上無明顯抑係有誤差，無斯研究方法毋罅完整。這項研究係頭一擺提出科學證據，顯示人該兜个睡眠品質在月週期裡肚改變。
不過這係一項意外个發現。
瑞士巴賽爾大學个生物學家卡約翰摎研究團隊在 2000 年～2003 年間，在另一項「年齡對睡眠个影響」个研究裡肚，記錄咧 33 位健康受測者个睡眠狀況。藉由腦電波測量腦个活動，做得知受測者睡到幾深，還有睡幾久。研究結束後，研究團隊在某隻月圓夜到酒吧啉酒，一隻突發奇想，大家決定轉去分析收集著个睡眠數據摎月光圓缺个關係。
因為研究團隊分析个數據並毋係為著研究睡眠摎月圓个關係正收集个，因為恁樣做得排除預設結果所可能產生个偏差，也就比過去个其他研究更做得得著可信个結論。根據收集著个數據佢兜發現，在月圓前後幾日，平均愛多花 5 分鐘正做得睡忒，逐暗睡眠時間減少咧 20 分鐘。簡單來講，月圓時期人該兜明顯毋好睡。
做麼个會恁樣喏？受測者个間肚並無透落月光，也就係講月光並毋係調控睡眠个主要因素。可能个解釋係月光抑係其他因素只參與咧一細部分个調控，使體內个生物時鐘摎外在環境同步，續下來就算無光線，生物時鐘還緊在該作用，調節體內个生理狀況。毋過這都還需要更多个研究正做得確定，像係記錄腦電波訊號在一隻月內个變化。
當多生物个遷徙、繁殖都隨等月光圓缺在該行動，無定著人類內在也囥等這隻古老个「支配」，在月圓个時節翻去翻轉睡毋忒……
毋好睡係無？看啊今晡日係舊曆幾多號？（四縣腔）
若係你這幾日貶去貶轉睡毋忒，看啊今晡日係舊曆幾多號，無定著係因為接近 15 號滿月，故所睡毋忒（當然毋係因為月光亮心慌慌）。研究發現，在接近滿月之前，就算月光無照落間肚，人會花較長个時間正睡忒，睡到較淺，睡目時間也較短。
無定著有兜人早就發現這點咧，逐隻月總有幾下日特別難睡，也有盡多奇聞軼事提著睡眠、情緒受著月光朔望週期个影響。毋知當科學家深入研究，總係在統計結果上無明顯抑係有誤差，無就研究方法毋罅完整。這項研究係頭一擺提出科學證據，顯示人該兜个睡眠品質在月週期裡肚改變。
不過這係一項意外个發現。
瑞士巴賽爾大學个生物學家卡約翰摎研究團隊在 2000 年～2003 年間，在另一項「年齡對睡眠个影響」个研究裡肚，記錄咧 33 位健康受測者个睡眠狀況。藉由腦電波測量腦个活動，做得知受測者睡到幾深，還有睡幾久。研究結束後，研究團隊在某隻月圓夜到酒吧啉酒，一隻突發奇想，大家決定轉去分析收集著个睡眠數據摎月光圓缺个關係。
因為研究團隊分析个數據並毋係為著研究睡眠摎月圓个關係正收集个，因為恁樣做得排除預設結果所可能產生个偏差，也就比過去个其他研究更做得得著可信个結論。根據收集著个數據佢兜發現，在月圓前後幾日，平均愛多花 5 分鐘正做得睡忒，逐暗晡睡眠時間減少咧 20 分鐘。簡單來講，月圓時期人該兜明顯毋好睡。
做麼个會恁樣喏？受測者个間肚並無透落月光，也就係講月光並毋係調控睡眠个主要因素。可能个解釋係月光抑係其他因素只參與咧一細部分个調控，使體內个生物時鐘摎外在環境同步，續下來就算無光線，生物時鐘還緊在該作用，調節體內个生理狀況。毋過這都還需要更多个研究正做得確定，像係記錄腦電波訊號在一隻月內个變化。
當多生物个遷徙、繁殖都隨等月光圓缺在該行動，無定著人類內在也囥等這隻古老个「支配」，在月圓个時節貶去貶轉睡毋忒……
看更多客語版朗讀素材，請見：【寶溫盃】客語朗讀比賽「暢樂搞科學」
