寶溫盃客語朗讀比賽邁入第 13 屆，而受到新冠肺炎疫情影響，這屆賽事從 4 月延至 7 月 25 日，今年特別以泛科學網站文章，作為朗讀素材，鼓勵更多人來傳播科學知識。以下收錄相關朗讀素材供參考。
原始文章連結：40%的螞蟻天天裝忙？廢柴「懶惰蟻」為何存在？
40% 个蟻公日日詐意恁無閒？廢樵「懶尸蟻」為著麼个存在？（海陸腔）
蟻公係一等勤勞个昆蟲？誤會大咧！
每當 亻恩 俚揙開寓言故事，蟻公永久都係「勤勞」个最佳代表，毋過，這隻認知其實摎現實爭大碼咧！
來自亞歷桑納大學个昆蟲學者丹尼爾 (Daniel) 在 2015 年个時節發現：就算蟻公个社會看起來煞猛又無閒直掣，這兜蠕蠕動个烏點裡肚大約有 40% 其實係無麼个活跳个。還這恁久，佢更進一步个確定咧這兜「懶尸蟻」个存在原因。
排除咧蟻公排休个可能，還過季節、日時頭暗晡頭影響佢兜「工作道德」个各種假設之後，研究者包尾个結論係：有兜蟻公就係比較「專長」做隻懶尸鬼，毋過，到底係麼个原因造成咧這種明顯毋公平个現象，科學家嗄吂有定論。
想看清楚蟻公，就為佢兜點上色彩啊！
還在最近个實驗裡肚，總算尋著咧這兜毋作為个蟻公該兜存在个意義，仰會做得解開這隻謎題，還愛承蒙世上一等細个「蟻體彩繪」。
「 亻恩 俚在蟻公身上點上顏料。」「頭那一點、胸脯一點、肚屎兩點，這兜彩色點點个組合分 亻恩 俚做得分辨逐隻個體，方便 亻恩 俚在錄影裡肚追蹤佢兜。」
實驗團隊摎這種標示系統運用在 20 隻切胸蟻个蟻竇裡肚，這兜蟻公來自亞歷桑納个聖卡特琳娜山脈。運用繽紛个色彩，研究團隊尋著咧蟻竇裡肚一等活跳／一等毋活跳个蟻公。
在一連串个實驗裡肚，研究者分別摎一等活跳／一等毋活跳个蟻公徙出蟻竇，下後佢兜發現咧這兜「懶尸蟻」个存在目的：佢兜係儲備勞動力，斯有在最需要个時節正會上場發揮作用。
若係活跳蟻公裡肚一等優秀个前 20% 畀剔除勞動力，該兜毋活跳个蟻公就會正式進入工作系統，接替佢兜原旦个位仔。
在這隻研究團隊先前个研究裡肚識提出這隻現象代表个功能：這種「人事重組」个功能係一種確保蟻竇裡肚擁有一定比例積極工作者个機制。「認為『懶尸蟻』做得充當替代勞動力係 亻恩 俚長期以來个疑狐，」其中一位研究者安那‧多倫浩斯 (Anna Dornhaus) 講，「但這斯係一種假設，過去從來吂獲得證實。」
40% 个蟻公日日詐意恁無閒？廢樵「懶尸蟻」為著麼个存在？（四縣腔）
蟻公係一等勤勞个昆蟲？誤會大咧！
每當 亻恩 俚揙開寓言故事，蟻公永久都係「勤勞」个最佳代表，毋過，這隻認知其實摎現實爭大碼咧！
來自亞歷桑納大學个昆蟲學者丹尼爾 (Daniel) 在 2015 年个時節發現：就算蟻公个社會看起來煞猛又無閒洎杈，這兜蠕蠕動个烏點裡肚大約有 40% 其實係無麼个活跳个。還這恁久，佢更進一步个確定咧這兜「懶尸蟻」个存在原因。
排除咧蟻公排休个可能，還過季節、日時頭暗晡頭影響佢兜「工作道德」个各種假設之後，研究者包尾个結論係：有兜蟻公就係比較「專長」做隻懶尸鬼，毋過，到底係麼个原因造成咧這種明顯毋公平个現象，科學家嗄吂有定論。
想看清楚蟻公，就為佢兜點上色彩啊！
還在最近个實驗裡肚，總算尋著咧這兜毋作為个蟻公該兜存在个意義，仰會做得解開這隻謎題，還愛承蒙世上一等細个「蟻體彩繪」。
「 亻恩 俚在蟻公身項點上顏料。」「頭那一點、胸脯一點、肚屎兩點，這兜彩色點點个組合分 亻恩 俚做得分辨逐隻個體，方便 亻恩 俚在錄影裡肚追蹤佢兜。」
實驗團隊摎這種標示系統運用在 20 隻切胸蟻个蟻竇裡肚，這兜蟻公來自亞歷桑納个聖卡特琳娜山脈。運用繽紛个色彩，研究團隊尋著咧蟻竇裡肚一等活跳／一等毋活跳个蟻公。
在一連串个實驗裡肚，研究者分別摎一等活跳／一等毋活跳个蟻公徙出蟻竇，下後佢兜發現咧這兜「懶尸蟻」个存在目的：佢兜係儲備勞動力，就在最需要个時節正會上場發揮作用。
若係活跳蟻公裡肚一等優秀个前 20% 畀剔除勞動力，該兜毋活跳个蟻公就會正式進入工作系統，接代佢兜原旦个位仔。
在這隻研究團隊先前个研究裡肚識提出這隻現象代表个功能：這種「人事重組」个功能係一種確保蟻竇裡肚擁有一定比例積極工作者个機制。「認為『懶尸蟻』做得充當替代勞動力係 亻恩 俚長期以來个疑狐，」其中一位研究者安那‧多倫浩斯 (Anna Dornhaus) 講，「但這只係一種假設，過去從來吂獲得證實。」
看更多客語版朗讀素材，請見：【寶溫盃】客語朗讀比賽「暢樂搞科學」
