某科學の超電報

等毋掣排列仔?除忒尋代排,無定著你還做得當科學个插隊!│【寶溫盃】客語朗讀比賽

2020/07/25 |

寶溫盃客語朗讀比賽邁入第 13 屆,而受到新冠肺炎疫情影響,這屆賽事從 4 月延至 7 月 25 日,今年特別以泛科學網站文章,作為朗讀素材,鼓勵更多人來傳播科學知識。以下收錄相關朗讀素材供參考。

原始文章連結:等不及排隊?除了找代排,或許你還可以很科學的插隊!?

等毋掣排列仔?除忒尋代排,無定著你還做得當科學个插隊!(海陸腔)

無論係買票、算數、等車,抑係去影印店印報告,日常生活總有排毋忒个列仔,為著維護社會善良秩序, 亻恩 俚應該會乖乖排到隊伍个後尾,開始放空抑係滑手機仔。

但若係看等頭前長拉拉个人龍前進速度無停無動,又正經有無結無煞个急事愛遽遽離開,《亞特蘭大》雜誌整理咧幾隻科學方法,帶你擬定迅速插隊又毋會有爭議个最好解決辦法!

愛看排列个目的係麼个?

頭下碼,你愛考慮這隻隊伍到底係為著麼个目的存在个?若係斯係為著到郵局寄包裹、上銀行匯款,超市買隻飲料這類另日正來做也做得个事个話,通常斯愛表明急迫性抑斯會正占用一息仔時間,該兜人考慮著自家哪日也可能需要𢯭手,就比較願意分別儕插隊。

但若係搶國際巨星告別演唱會門票這種一生人一擺个,又抑係等等領急難物資這一類緊急个事件,建議你就乖乖排到隊伍後尾啊。

大膽个講出任何藉口

研究發現,不論好理由壞理由,斯愛肯講出嘴就有機會插隊。以當在該等待使用影印機个隊伍為例,單淨係禮貌詢問「敗勢,𠊎有五張愛印,做得分𠊎先印無?」就有 60% 个機會做得順利插隊;若係再強調自家當急,成功率做得提高到 94%,就算係最隨便个「𠊎想影印,做得用影印機無?」乜係有機會插隊,所以就大膽个開嘴詢問啊。斯愛你詢問係毋係做得插隊个該一個人同意,基本上後背排列个人也會恬恬同意你个行為。

但若係想更展現需要插隊个誠意,你還合做得摟出錢來,合毋使愁會有損失慘重──大部分个人顛倒會因為你竟然願意為著這種事摟錢來同理你个急迫性,願意免費分你插隊。

雖然成時排列仔正經當使人急躁,但斯愛想想若係大家都毋排列仔,盡多事情也無法度順利進行,所以為著社會个和諧秩序,除忒出門前預留時間、培養耐心外,正經無插隊做毋得个話乜毋好詐意無事,嘴碼好兜仔問一聲,無定著比你想个順利盡多喔,祝福大自家插隊順利!

等毋掣排列?除忒尋代排,無定著你還做得當科學个插隊哦!(四縣腔)

無論係買票、算數、等車,抑係去影印店印報告,日常生活總有排毋忒个列,為著維護社會善良秩序, 亻恩 俚應該會乖乖排到隊伍个後尾,開始放空抑係滑手機仔。

但若係看等頭前長拉拉个人龍前進速度無停無動,又正經有無結無煞个急事愛遽遽離開,《亞特蘭大》雜誌整理咧幾隻科學方法,帶你擬定迅速插隊又毋會有爭議个最好解決辦法!

愛看排列个目的係麼个?

頭下碼,你愛考慮這隻隊伍到底係為著麼个目的存在个?若係只係為著到郵局寄包裹、上銀行匯款,超市買隻飲料這類另日正來做也做得个事个話,通常只愛表明急迫性抑正會占用一息仔時間,該兜人考慮著自家哪日也可能需要𢯭手,就比較願意分別儕插隊。

但若係搶國際巨星告別演唱會門票這種一生人一擺个,又抑係等等領急難物資這一類緊急个事件,建議你就乖乖排到隊伍最後尾啊。

大膽个講出任何藉口

研究發現,不論好理由壞理由,只愛肯講出嘴就有機會插隊。以當在該等待使用影印機个隊伍為例,單淨係禮貌詢問「敗勢,𠊎有五張愛印,做得分𠊎先印無?」就有 60% 个機會做得順利插隊;若係再強調自家當急,成功率做得提高到 94%,就算係最隨便个「𠊎想影印,做得用影印機無?」乜係有機會插隊,故所就大膽个開嘴詢問啊。只愛你詢問係毋係做得插隊个該一個人同意,基本上後背排列个人也會恬恬同意你个行為。

但若係想更展現需要插隊个誠意,你還合做得摟出錢來,合毋使愁慮會有損失慘重──大部分个人顛倒會因為你竟然願意為著這種事摟錢來同理若个急迫性,願意免費分你插隊。

雖然成時排列正經當分人急躁,但只愛想想若係大家都毋排列,盡多事情也無法度順利進行,故所為著社會个和諧秩序,除忒出門前預留時間、培養耐心外,正經無插隊做毋得个話乜毋好詐意無事,嘴碼好兜仔問一聲,無定著比你想个順利盡多喔,祝福大自家插隊順利!

看更多客語版朗讀素材,請見:【寶溫盃】客語朗讀比賽「暢樂搞科學」

關於作者

PanSci

PanSci的管理者通用帳號,也會用來發表投稿文章跟活動訊息喔。

網站更新隱私權聲明
本網站使用 cookie 及其他相關技術分析以確保使用者獲得最佳體驗,通過我們的網站,您確認並同意本網站的隱私權政策更新,了解最新隱私權政策