某科學の超電報

小人物、懷舊風,再加上一些仔特異功能,分人緊想起周星馳!│【寶溫盃】客語朗讀比賽

2020/07/25 |

寶溫盃客語朗讀比賽邁入第 13 屆,而受到新冠肺炎疫情影響,這屆賽事從 4 月延至 7 月 25 日,今年特別以泛科學網站文章,作為朗讀素材,鼓勵更多人來傳播科學知識。以下收錄相關朗讀素材供參考。

原始文章連結:小人物、懷舊風,再加上一點特異功能,讓人不斷想起周星馳!——《超能家族》推薦序

小人物、懷舊風,再加上一些仔特異功能,分人緊想起周星馳!(海陸腔)

雖然「超能力」在這下个流行文化裡肚已經一些仔乜毋稀奇咧,斯像行在路上看板跌下來都會擲著兩個超能力者,但係《超能家族》這本小說還係分𠊎極大个驚喜摎滿足感。這斯係在漫威、DC、超人特攻隊、𠊎个英雄學院、一拳超人還過衍伸出个無數隻宇宙,摎做得講个超能力者故事大體都翻炒過毋知幾多輪之後。單淨這點,𠊎就願意為這本𠊎堵堵正讀忒个小說企䟘起來打拍仔三分鐘。

講著超能力,其實還較適合用在這部小說裡肚个詞係「特異功能」,比較復古一點,威力大約係手指識字、隔空抓藥、𥯥出一副同花順該隻級數,毋係召喚雷電抑係變身做綠色巨人該種。在全世界都因為《X 戰警》、《復仇者聯盟》摎《正義聯盟》系列合對動啊著世界末日个超能力大戰襛線之後,泰勒馬科斯一家个鳥事顛倒分人試著清新,在這位誠心誠意个希望 X 教授摎鋼鐵人永久毋好去攪操佢兜儕。

家庭環境失能到噦天嘶地,但係家族成員超能到飛天遁地个故事,本書當中个泰勒馬科斯一家當然毋係第一個。但係裡肚一個個角色魯蛇魯到恁入味、廢樵廢到分人試著敨氣都打爽,該斯無恁該哦。這家老嫩大細各種因為超能合低能个做法分人笑到揇肚屎,毋甘願平凡嗄分現實重力矺到頭那都擎毋起來,也分人心肝頭艱苦,這當然係隻嶄蠻古董个家庭故事,毋過搭配寫實个場景摎時代感,也實實在在描繪咧小人物个細微心境。

係唷,小人物、小敘事,懷舊風,加上一息仔特異功能,生劃劃就係周星馳《賭聖》摎《少林足球》个看板元素,分𠊎這隻星爺个粉絲忍毋核在讀書个時節緊想像,就連躺在眠床頂都在該想,若係這隻好故事,除忒必然問世个好萊塢版,還做得翻拍星爺版就好咧。雖然星爺个年紀吂得時到書中泰迪老爺个歲數,但係絕對係一等適合演出這隻角色个人咧。

另一方面,本書也分𠊎想起網飛 (Netflix) 頂高个熱播戲劇《怪奇物語》摎《遮仔學院》。共樣都有超能力、失能家庭、記憶摎歷史裡肚个謎團、穿越時空、祕密機關……還過一大堆細人仔,越係混亂越有看頭。讀者,像𠊎,強強會試著這家人正經係欠打又欠愛,但這毋就係屋下人係無?

小人物、懷舊風,再加上一息仔特異功能,分人緊想起周星馳!(四縣腔)

雖然「超能力」在這下个流行文化裡肚既/已經一息仔乜毋稀奇咧,就像行在路項看板跌下來都會擲著兩個超能力者,但係《超能家族》這本小說還係分𠊎極大个驚喜摎滿足感。這就係在漫威、DC、超人特攻隊、𠊎个英雄學院、一拳超人還過衍伸出个無數隻宇宙,摎做得講个超能力者故事大體都翻炒過毋知幾多輪之後。單淨這點,𠊎就願意為這本𠊎堵堵正讀忒个小說企䟘起來打拍仔三分鐘。

講著超能力,其實還較適合用在這部小說裡肚个詞係「特異功能」,比較復古一息仔,威力大約係手指識字、隔空抓藥、𥯥出一副同花順該隻級數,毋係召喚雷電抑係變身做綠色巨人該種。在全世界都因為《X 戰警》、《復仇者聯盟》摎《正義聯盟》系列合對動啊著世界末日个超能力大戰襛線之後,泰勒馬科斯一家个鳥事顛倒分人試著清新,在這位誠心誠意个希望 X 教授摎鋼鐵人永久毋好去攪操佢兜儕。

家庭環境失能到噦天嘶地,但係家族成員超能到飛天遁地个故事,本書當中个泰勒馬科斯一家當然毋係第一個。但係裡肚一個個角色魯蛇魯到恁入味、廢樵廢到分人試著敨氣都打爽,該斯無恁該哦。這家老嫩大細各種因為超能合低能个做法分人笑到揇肚屎,毋甘願平凡嗄分現實重力矺到頭那都擎毋起來,也分人心肝頭艱苦,這當然係隻嶄蠻/嶄然古董个家庭故事,毋過搭配寫實个場景摎時代感,也實實在在描繪咧小人物个細微心境。

係唷,小人物、小敘事,懷舊風,加上一息仔特異功能,生劃劃就係周星馳《賭聖》摎《少林足球》个看板元素,分𠊎這隻星爺个粉絲忍毋核在讀書个時節緊想像,就連橫在眠床頂都在該想,若係這隻好故事,除忒必然問世个好萊塢版,還做得翻拍星爺版就好咧。雖然星爺个年紀吂得時到書中泰迪老爺个歲數,但係絕對係一等適合演出這隻角色个人咧。

另一方面,本書也分𠊎想起網飛 (Netflix) 頂高个熱播戲劇《怪奇物語》摎《遮仔學院》。共樣都有超能力、失能家庭、記憶摎歷史裡肚个謎團、穿越時空、祕密機關……還過一大堆細人仔,越係混亂越有看頭。讀者,像𠊎,強強會試著這家人正經係欠打又欠愛,但這毋就係屋下人係無?

看更多客語版朗讀素材,請見:【寶溫盃】客語朗讀比賽「暢樂搞科學」

關於作者

PanSci

PanSci的管理者通用帳號,也會用來發表投稿文章跟活動訊息喔。

網站更新隱私權聲明
本網站使用 cookie 及其他相關技術分析以確保使用者獲得最佳體驗,通過我們的網站,您確認並同意本網站的隱私權政策更新,了解最新隱私權政策