某科學の超電報

耳屎毋使挖挖啊!你个耳空會自動清潔│【寶溫盃】客語朗讀比賽

2020/07/25 |

寶溫盃客語朗讀比賽邁入第 13 屆,而受到新冠肺炎疫情影響,這屆賽事從 4 月延至 7 月 25 日,今年特別以泛科學網站文章,作為朗讀素材,鼓勵更多人來傳播科學知識。以下收錄相關朗讀素材供參考。

原始文章連結:耳屎不用挖挖哇!你的耳朵會自動清潔

耳屎毋使挖挖啊!你个耳空會自動清潔(海陸腔)

你平常都會用麼个方式清理耳空喏?用摟耳精仔、棉精仔、手指甲抑係頭那毛夾仔來挖,總講試著耳空裡肚有耳屎就係分你歸身虐削,無摎佢挖出來做毋得;抑係,佢毋犯𠊎𠊎毋犯佢,總講耳屎無分𠊎試著毋鬆爽,就隨在佢自生自滅啦!

不管你先前係用哪種方法摎耳屎相處,根據耳鼻喉科期刊最新提出个建議,你其實應該麼个都毋使做。

「毋好摎任何比手㬹較細个東西放落若个耳空!」

雖然大部分人都有清理耳空个習慣,毋過,恁樣無定著顛倒會傷害若个耳空。這兜細細个挖耳器材都有可能會刮傷耳道,還合造成耳膜仔爛空抑係聽小骨移位个風險,進一步因致病人耳空隆隆滾、頭暈摎聽力受著損害。

𠊎毋清耳屎,敢講耳屎會自動消失係無?

毋過若係毋定期清理,敢講 亻恩 俚个耳空毋會哪日耳屎大爆發係無?其實你毋使愁恁多,因為耳空會產生耳屎,就係在進行自我清潔个動作。耳屎做得潤滑 亻恩 俚个耳空,還該塵灰摎其他進入耳空肚个骯髒東西就會黏在耳屎頂高,正毋會深入耳道造成其他影響;話講轉來,若係 亻恩 俚毋堵好使用工具去清潔耳空,顛倒會有可能摎耳屎𢱤落耳道深處,造成發炎。

愛證實耳屎个清潔功能,該兜科學家斯花費咧已多心思,因為,愛尋著足量个「純正」耳屎該斯無恁該。

研究團隊分別對堵正死忒个豬、狗、羊摎兔仔膴身汲取「黃金」,佢兜分別係無共樣个體型、耳道長度摎生活型態个動物代表,為研究樣本帶來多樣性。

佢兜發現所有哺乳類動物个耳屎,性質都十分相像若係議論真來講還已像係「番茄醬」!雖然外觀看起來天差地別,但科學家其實試用番茄醬來比喻耳屎个流動性質,堵正開始會有兜仔黏核核,毋過若係你搖搖盎仔,番茄醬(耳屎)就會跌出來。當研究者在耳屎裡肚加落塵灰,耳屎會慢慢仔變到燥燥合碎碎,有兜像係加昶多麵粉个燥麵糰。

只係觀察有一息仔毋罅,科學家也試看啊在實驗室肚打造耳屎。佢兜摎麵粉摻水做成糊仔,合摎佢抹在人造耳空个四圍,堵正開始這兜假耳屎會在耳道裡肚黏核核,毋過,若係有空氣經過,假耳屎就會變到燥燥,這時,斯愛人工耳空有兜仔小可个尖矻變形,假耳屎就會自動跌下來。

耳屎毋使挖挖啊!你个耳公會自動清潔(四縣腔)

你平常都會用麼个方式清理耳公喏?用摟耳精仔、棉精仔、手指甲抑係頭那毛夾仔來挖,總講試著耳公裡肚有耳屎就係分你歸身虐削,無摎佢挖出來做毋得;抑係,佢毋犯𠊎𠊎毋犯佢,總講耳屎無分𠊎試著毋鬆爽,就隨在佢自生自滅啦!

不管你先前係用哪種方法摎耳屎相處,根據耳鼻喉科期刊最新提出个建議,你其實應該麼个都毋使做。

「毋好摎任何比手㬹較細个東西放落若个耳公!」

雖然大部分人都有清理耳公个習慣,毋過,恁樣無定著顛倒會傷害若个耳公。這兜細細个挖耳器材都有可能會刮傷耳道,還合造成耳膜仔爛空抑係聽小骨移位个風險,進一步因致病人耳公隆隆滾、頭暈摎聽力受著損害。

𠊎毋清耳屎,敢講耳屎會自動消失係無?

毋過若係毋定期清理,敢講 亻恩 俚个耳公毋會哪日耳屎大爆發係無?其實你毋使愁恁多,因為耳公會產生耳屎,就係在進行自我清潔个動作。耳屎做得潤滑 亻恩 俚个耳公,還該塵灰摎其他進入耳公肚个骯髒東西就會黏在耳屎頂高,正毋會深入耳道造成其他影響;顛倒頭來講,若係 亻恩 俚毋堵好使用工具去清潔耳公,顛倒會有可能摎耳屎𢱤落耳道深處,造成發炎。

愛證實耳屎个清潔功能,該兜科學家係花費咧已多心思,因為,愛尋著足量个「純正」耳屎該斯無恁該。

研究團隊分別對正死忒个豬、狗、羊摎兔仔膴身汲取「黃金」,佢兜分別係無共樣个體型、耳道長度摎生活型態个動物代表,為研究樣本帶來多樣性。

佢兜發現所有哺乳類動物个耳屎,性質都十分相像若係論真來講還已像係「番茄醬」!雖然外觀看起來天差地別,但科學家其實試用番茄醬來比喻耳屎个流動性質,正開始會有兜仔黏核核,毋過若係你搖搖盎仔,番茄醬(耳屎)就會跌出來。當研究者在耳屎裡肚加落塵灰,耳屎會慢慢仔變到燥燥合碎碎,有兜像係加忒多麵粉个燥麵糰。

總係觀察有一息仔毋罅,科學家也試看啊在實驗室肚打造耳屎。佢兜摎麵粉摻水做成羹,合摎佢抹在人造耳公个四圍,正開始這兜假耳屎會在耳道裡肚黏核核,毋過,若係有空氣經過,假耳屎就會變到燥燥,這時,只愛人工耳公有兜仔小可个尖矻變形,假耳屎就會自動跌下來。

看更多客語版朗讀素材,請見:【寶溫盃】客語朗讀比賽「暢樂搞科學」

關於作者

PanSci

PanSci的管理者通用帳號,也會用來發表投稿文章跟活動訊息喔。

網站更新隱私權聲明
本網站使用 cookie 及其他相關技術分析以確保使用者獲得最佳體驗,通過我們的網站,您確認並同意本網站的隱私權政策更新,了解最新隱私權政策