某科學の超電報

心電感應毋罅看,魚蝦用尿溝通 94 狂!│【寶溫盃】客語朗讀比賽

2020/07/25 |

寶溫盃客語朗讀比賽邁入第 13 屆,而受到新冠肺炎疫情影響,這屆賽事從 4 月延至 7 月 25 日,今年特別以泛科學網站文章,作為朗讀素材,鼓勵更多人來傳播科學知識。以下收錄相關朗讀素材供參考。

原始文章連結:心電感應不夠看,魚蝦用尿溝通94狂!

心電感應毋罅看,魚蝦用尿溝通 94 狂!(海陸腔)

藉由文字摎口語个使用,人類正做得彼此溝通,進一步發展出獨特个文明。還除忒人類个語言之外,動物乜會各自用獨特个方式溝通:蜂仔跳舞、獅仔吼吼滾、海豚歕口息仔……。還在這兜千奇百怪个溝通方法裡肚,科學家更發現,原來尿液也做得成為溝通工具,不管係談情說愛抑係相打鬧事,斯愛有「尿」,一切盡在不言中。

為著研究通訊小龍蝦仰般利用尿液進行溝通,科學家遮起咧小龍蝦个目珠,想看看在烏暗之中,小龍蝦該兜仰般談情說愛。

在一連串个實驗後,研究者發現,若係摎嫲小龍蝦个腎臟堵等,使佢無法度痾尿,該恁樣,公个小龍蝦會對佢詐無看著、還合大打出手。還一旦嫲个小龍蝦透過尿液傳達出做得交配个訊息,公个小龍蝦黏邊會變到「性」致勃勃,想愛一下抓等嫲个小龍蝦,摎愛人來一場驚天動地个雲雨之歡。

毋過,想摎嫲个小龍蝦交配就毋係一件簡單个事情。在繁衍後代个時節,嫲个小龍蝦毋單淨負擔生殖个責任、更需要進行育幼,顛倒來看公个小龍蝦斯需要提供精子,就做得擛擛衫袖毋帶走一片雲彩。還正因為對於無共樣性別个小龍蝦來講,繁衍个成本差距昶大,嫲个小龍蝦絕對毋儘採接受路上个野男人。

想愛贏得女士个芳心,公个小龍蝦愛先通過「比武招親」:唯有先打敗嫲个小龍蝦,正做得獲得交配个資格。

戰鬥守則第一條:痾尿時機愛捉好!

公个小龍蝦摎嫲个小龍蝦个尿液各自有等無共樣个訊息:公个小龍蝦會在戰鬥中用尿液表示敵意,還嫲个小龍蝦个尿液就同時代表咧邀請摎挑戰之意。所以,在戰鬥過程中,公个小龍蝦會盡量避免痾尿,做毋得激發愛人个敵意;相反个,嫲个小龍蝦這隻嬌尸撥撥个細阿妹仔就會緊痾尿去刺激男伴,一頭餳佢、一頭抵抗佢。

嫲个小龍蝦會在尿液肚表達出恁矛盾个訊息,就係希望做得確定對方到底係毋係自家个如意郎君,藉由雙方交手个過程,嫲个小龍蝦做得判斷出對方个體格、能力,若係對方罅砸,嫲个小龍蝦正會考慮摎佢交配來產下優秀个後代。

心電感應毋罅看,魚蝦用尿溝通 94 狂!(四縣腔)

藉由文字摎口語个使用,人類正做得彼此溝通,進一步發展出獨特个文明。還除忒人類个語言之外,動物乜會各自用獨特个方式溝通:蜂仔跳舞、獅仔吼吼滾、海豚歕口息仔……。還在這兜千奇百怪个溝通方法裡肚,科學家更發現,原來尿液也做得成為溝通工具,不管係談情說愛抑係相打鬧事,就愛有「尿」,一切盡在不言中。

為著研究通訊小龍蝦仰般利用尿液進行溝通,科學家遮起咧小龍蝦个目珠,想看看在烏暗之中,小龍蝦該兜仰般談情說愛。

在一連串个實驗後,研究者發現,若係摎嫲个小龍蝦个腎臟堵等,使佢無法度痾尿,該恁樣,公个小龍蝦會對佢詐無看著、還合大打出手。還一旦嫲个小龍蝦透過尿液傳達出做得交配个訊息,公个小龍蝦黏時會變到「性」致勃勃,想愛一下抓等嫲个小龍蝦,摎愛人來一場驚天動地个雲雨之歡。

毋過,想摎嫲个小龍蝦交配就毋係一件簡單个事情。在繁衍後代个時節,嫲个小龍蝦毋單淨負擔生殖个責任、更需要進行育幼,顛倒來看公个小龍蝦只需要提供精子,就做得擛擛衫袖毋帶走一片雲彩。還正因為對於無共樣性別个小龍蝦來講,繁衍个成本差距忒大,嫲个小龍蝦絕對毋儘採接受路上个野男人。

想愛贏得女士个芳心,公个小龍蝦愛先通過「比武招親」:唯有先打敗嫲个小龍蝦,正做得獲得交配个資格。

戰鬥守則第一條:痾尿時機愛捉好!

公个小龍蝦摎嫲个小龍蝦个尿液各自有等無共樣个訊息:公个小龍蝦會在戰鬥中用尿液表示敵意,還嫲个小龍蝦个尿液就同時代表咧邀請摎挑戰之意。故所,在戰鬥過程中,公个小龍蝦會盡量避免痾尿,做毋得激發愛人个敵意;相反个,嫲个小龍蝦這隻嬌尸撥撥个細阿妹仔就會緊痾尿去刺激男伴,一頭餳佢、一頭抵抗佢。

嫲个小龍蝦會在尿液肚表達出恁矛盾个訊息,就係希望做得確定對方到底係毋係自家个如意郎君,藉由雙方交手个過程,嫲个小龍蝦做得判斷出對方个體格、能力,若係對方罅砸,嫲个小龍蝦正會考慮摎佢交配來產下優秀个後代。

看更多客語版朗讀素材,請見:【寶溫盃】客語朗讀比賽「暢樂搞科學」

關於作者

PanSci

PanSci的管理者通用帳號,也會用來發表投稿文章跟活動訊息喔。

網站更新隱私權聲明
本網站使用 cookie 及其他相關技術分析以確保使用者獲得最佳體驗,通過我們的網站,您確認並同意本網站的隱私權政策更新,了解最新隱私權政策