某科學の超電報

足球賽前國歌唱到越熱情就越有機會贏?關於世足國歌个該兜事│【寶溫盃】客語朗讀比賽

2020/07/25 |

寶溫盃客語朗讀比賽邁入第 13 屆,而受到新冠肺炎疫情影響,這屆賽事從 4 月延至 7 月 25 日,今年特別以泛科學網站文章,作為朗讀素材,鼓勵更多人來傳播科學知識。以下收錄相關朗讀素材供參考。

原始文章連結:足球賽前國歌唱得越熱情就越有機會贏?關於世足國歌的那些事

足球賽前國歌唱到越熱情就越有機會贏?關於世足國歌个該兜事(海陸腔)

2018 年个世足當當在俄羅斯熱烈个展開,當你買好咧啤酒炸雞米冇仔个時節,電視肚傳來悠揚个國歌旋律,有兜平和、有兜激昂,但係,你正經識詳細聽這兜歌曲無?佢兜背後正經係囥等盡多愛恨糾葛啊!

想唱國歌無好唱,講起來全係目汁

在這屆小組賽 B 組第一輪裡肚分人當關心个西葡大戰, 亻恩 俚就做得非常清楚个看著兩國演唱國歌時个差異。

你做得看著盡多葡萄牙人在演唱國歌時仰般激動,這首《葡萄牙人》聽起來慷慨激昂、振奮人心,佢个誕生,摎葡萄牙个革命之路息息相關。19 世紀末期,王室為著粉紅地圖計劃嗄加重稅賦,隨後嗄又在英國个威脅之下兩儕講和。消息傳轉國內,群情激憤、質疑君主,共和黨作家就譜下這條曲,激勵同胞該兜挺身而戰。還在 1910 年革命成功後,這首歌仔就變做國歌咧。

顛倒來看葡萄牙个對手該兜就冷靜多咧,西班牙球員該兜挷等高冷个緣投面,嘴唇密等、表情嚴肅,斯成下會看著球員抑係球迷開嘴哼哼兩句仔,咦咦咦?這到底係仰般啊?

原來,西班牙个國歌《皇家進行曲》係無歌詞个。在佛朗哥時代識為這條曲填詞,毋過在威權統治結束後,充滿法西斯色彩个歌詞就畀廢除。唉呀,恁樣逐擺球賽開場个時節毋會有點冷場係無?老實講,還正經有點仔。西班牙个奧委會主席對這深有所感,所以在 2007 年該量時,識號召過歌詞徵集比賽,斯打爽包尾半離半綻。短時間內,恁樣个小小尷尬可能還係會繼續下去。

另一方面,在世足賽裡肚無辦法開嘴唱歌个隊伍還有阿根廷,這並毋係因為有麼个特別个原因,斯係因為阿根廷國歌个「前奏昶、長、咧!」阿根廷个國歌長達 3 分鐘,毋過在世足賽个時節正有 90 秒个國歌演唱時間,花忒該時間都還吂進入副歌,球員該兜自然也就無開嘴个機會啦!

但係,敢講國歌一定愛恁樣死對頭係無?還愛揹等贏球輸球个重擔?這一屆个世足開賽前就識出現祕魯摎丹麥兩國間个「溫馨國歌情」。

得人惜个祕魯隊 36 年無參加咧,總算回歸世界盃,看得出佢兜歡喜歷天。祕魯足協在開賽前向共一小組个各隊送上了祝福,還暖心个丹麥隊就用非常溫馨又認真个方式回禮分本屆世界盃个頭一場對手:

丹麥毋單淨請來盡多球壇上个足球巨星,又合特別改編自家个國歌歌詞,摎改編過个曲調獻分祕魯。兩隊都煞猛分隊伍間个競爭看起來像好朋友樣,也分人發現著國歌竟然也做得變做運動精神个體現方式。不過,友好還友好、贏球還贏球,丹麥還係在 6 月 17 日一比零贏祕魯咧,獲得世足頭一到贏个隊伍。

足球賽前國歌唱到越熱情就越有機會贏?關於世足國歌个該兜事(四縣腔)

2018 年个世足當當在俄羅斯熱烈个展開,當你買好咧啤酒炸雞砰米𥺆个時節,電視肚傳來悠揚个國歌旋律,有兜平和、有兜激昂,但係,你正經識詳細聽這兜歌曲無?佢兜背後正經係囥等盡多愛恨糾葛啊!

想唱國歌無好唱,講起來全係目汁

在這屆小組賽 B 組第一輪裡肚分人當關心个西葡大戰, 亻恩 俚就做得非常清楚个看著兩國演唱國歌時个差異。

你做得看著盡多葡萄牙人在演唱國歌時仰般激動,這首《葡萄牙人》聽起來慷慨激昂、振奮人心,佢个誕生,摎葡萄牙个革命之路息息相關。19 世紀末期,王室為著粉紅地圖計劃嗄加重稅賦,隨後嗄又在英國个威脅之下兩儕講和。消息傳轉國內,群情激憤、質疑君主,共和黨作家就譜下這條曲,激勵同胞該兜挺身而戰。還在 1910 年革命成功後,這首歌仔就成為國歌咧。

顛倒來看葡萄牙个對手該兜就冷靜多咧,西班牙球員該兜挷等高冷个緣投面,嘴唇密等、表情嚴肅,就成下會看著球員抑係球迷開嘴哼哼兩句仔,咦咦咦?這到底係仰般啊?

原來,西班牙个國歌《皇家進行曲》係無歌詞个。在佛朗哥時代識為這條曲填詞,毋過在威權統治結束後,充滿法西斯色彩个歌詞就分人廢除。唉呀,恁樣逐擺球賽開場个時節毋會有點冷場係無?老實講,還正經有兜仔。西班牙个奧委會主席對這深有所感,故所在 2007 年該央時,識號召過歌詞徵集比賽,就打爽包尾半離半綻。短時間內,恁樣个小小尷尬可能還係會繼續下去。

另一方面,在世足賽裡肚無辦法開嘴唱歌个隊伍還有阿根廷,這並毋係因為有麼个特別个原因,就係因為阿根廷國歌个「前奏忒、長、咧!」阿根廷个國歌長達 3 分鐘,毋過在世足賽个時節正有 90 秒个國歌演唱時間,花忒該時間都還吂進入副歌,球員該兜自然也就無開口个機會啦!

但係,敢講國歌一定愛恁樣死對頭係無?還愛揹等贏球輸球个重擔?這一屆个世足開賽前就識出現祕魯摎丹麥兩國間个「溫馨國歌情」。

得人惜个祕魯隊 36 年無參加咧,總算回歸世界盃,看得出佢兜歡喜歷天。祕魯足協在開賽前向共一小組个各隊送上了祝福,還暖心个丹麥隊就用非常溫馨又認真个方式回禮分本屆世界盃个頭一場對手:

丹麥毋單淨請來盡多球壇項个足球巨星,又合特別改編自家个國歌歌詞,摎改編過个曲調獻分祕魯。兩隊都煞猛分隊伍間个競爭看起來像好朋友樣,也分人發現著國歌竟然也做得成為運動精神个體現方式。不過,友好還友好、贏球還贏球,丹麥還係在 6 月 17 日一比零贏過祕魯咧,獲得世足頭一到贏个隊伍。

看更多客語版朗讀素材,請見:【寶溫盃】客語朗讀比賽「暢樂搞科學」

關於作者

PanSci

PanSci的管理者通用帳號,也會用來發表投稿文章跟活動訊息喔。

網站更新隱私權聲明
本網站使用 cookie 及其他相關技術分析以確保使用者獲得最佳體驗,通過我們的網站,您確認並同意本網站的隱私權政策更新,了解最新隱私權政策