某科學の超電報

阿姆!到底做麼个阿姆節愛送康乃馨啊?│【寶溫盃】客語朗讀比賽

2020/07/25 |

寶溫盃客語朗讀比賽邁入第 13 屆,而受到新冠肺炎疫情影響,這屆賽事從 4 月延至 7 月 25 日,今年特別以泛科學網站文章,作為朗讀素材,鼓勵更多人來傳播科學知識。以下收錄相關朗讀素材供參考。

原始文章連結:媽!!!到底為什麼母親節要送康乃馨啊?

阿姆!到底做麼个阿姆節愛送康乃馨啊?(海陸腔)

逐年个阿姆節,當多人都會買康乃馨送分阿姆。但係,你有想過無:到底做麼个阿姆節愛送康乃馨分阿姆?康乃馨到底係種仰般形个植物喏?

康乃韾象徵阿姆,到底係麼人決定个?

愛談著阿姆節送康乃馨个傳統,就不得不提起阿姆節个起源。其實, 亻恩 俚這下過个阿姆節係隻已「新」个節日,係由一位安到安娜‧賈維斯个美國細妹仔所推廣个。

賈維斯个阿姆在生前斯長透表達自家期望做得有一隻做得紀念阿姆个日仔;還在厥姆過身个三年後,1908 年个 5 月 10 日,賈維斯在教堂肚舉行咧紀念儀式,成為史上第一隻阿姆節。

賈維斯選擇用白色个康乃馨來象徵阿姆,因為佢認為康乃馨个潔白做得代表母愛个真誠寬廣。佢也認為康乃馨花瓣毋會一片片㪐忒、係對中心晁忒个這隻特質,斯像阿姆揇細人仔共樣。

嗯……毋過後來該兜生理人看著嗄暢到奈毋得,白色康乃馨个價格黏時起價,花販仔還較進一步推廣紅色康乃馨,營造出「紅色康乃馨送分健康个阿姆、白色康乃馨紀念過身个阿姆」這種講法,分賈維斯女士閼到會死。

康乃馨个花瓣毋係正經个花瓣?

先莫講創辦人个閼,還過這下送阿姆白色康乃馨可能會分佢打, 亻恩 俚這下看著个康乃馨其實全係基因突變過後个「畸形花」。康乃馨又安到「香石竹」,原始野生个品種斯有五皮花瓣,看上去十分單薄。

該這下 亻恩 俚在花店看著該兜層層疊疊个靚靚花瓣到底係麼个?其實佢兜係雄蕊喔!

雄蕊摎花瓣原旦都來自於「花原基」,當調控个基因出現突變,就會分雄蕊「瓣化」。雄蕊花瓣化後,變形个雄蕊摎原旦个花瓣重疊後,就形成咧重瓣花。恁樣一來,使著歸蕊花个體型看起來變到還較大,也還較具有觀賞價值。

雖然恁樣个花多數个雄蕊變形,所以不容易產生花粉,嗄會因為生著靚正分人工繁殖留下來咧,慢慢仔變成 亻恩 俚這下看著个樣仔。

阿姆!到底做麼个阿姆節愛送康乃馨啊?(四縣腔)

逐年个阿姆節,當多人都會買康乃馨送分阿姆。但係,你有想過無:到底做麼个阿姆節愛送康乃馨分阿姆?康乃馨到底係種仰般形个植物喏?

康乃韾象徵阿姆,到底係麼人決定个?

愛談著阿姆節送康乃馨个傳統,就不得不提起阿姆節个起源。其實, 亻恩 俚這下過个阿姆節係隻已「新」个節日,係由一位安到安娜‧賈維斯个美國細妹仔所推廣个。

賈維斯个阿姆在生前就輒輒表達自家期望做得有一隻做得紀念阿姆个日仔;還在厥姆過身个三年後,1908 年个 5 月 10 日,賈維斯在教堂肚舉行咧紀念儀式,成為史上第一隻阿姆節。

賈維斯選擇用白色个康乃馨來象徵阿姆,因為佢認為康乃馨个潔白做得代表母愛个真誠寬廣。佢也認為康乃馨花瓣毋會一片片㪐忒、係對中心晁忒个這隻特質,就像阿姆揇細人仔共樣。

嗯……毋過後來該兜生理人看著嗄暢到奈毋得,白色康乃馨个價格黏時起價,花販仔還較進一步推廣紅色康乃馨,營造出「紅色康乃馨送分健康个阿姆、白色康乃馨紀念過身个阿姆」這種講法,摎賈維斯女士譴到會死。

康乃馨个花瓣毋係正經个花瓣?

先莫講創辦人个閼,還過這下送阿姆白色康乃馨可能會分佢打, 亻恩 俚這下看著个康乃馨其實全係基因突變過後个「畸形花」。康乃馨又安到「香石竹」,原始野生个品種只有五皮花瓣,看上去十分單薄。

該這下 亻恩 俚在花店看著該兜層層疊疊个靚靚花瓣到底係麼个?其實佢兜係雄蕊喔!

雄蕊摎花瓣原旦都來自於「花原基」,當調控个基因出現突變,就會分雄蕊「瓣化」。雄蕊花瓣化後,變形个雄蕊摎原旦个花瓣重疊後,就形成咧重瓣花。恁樣一來,使著歸蕊花个體型看起來變到還較大,也還較具有觀賞價值。

雖然恁樣个花多數个雄蕊變形,故所不容易產生花粉,嗄會因為生著靚正分人工繁殖留下來咧,慢慢變成 亻恩 俚這下看著个樣仔。

看更多客語版朗讀素材,請見:【寶溫盃】客語朗讀比賽「暢樂搞科學」

關於作者

PanSci

PanSci的管理者通用帳號,也會用來發表投稿文章跟活動訊息喔。

網站更新隱私權聲明
本網站使用 cookie 及其他相關技術分析以確保使用者獲得最佳體驗,通過我們的網站,您確認並同意本網站的隱私權政策更新,了解最新隱私權政策